विराटनगर किंग्सको प्रशिक्षकमा धम्मिका प्रसादलाई निरन्तरता

नेपाल प्रिमियर लिग एनपीएलको तेस्रो संस्करणका लागि विराटनगर किंग्सले श्रीलंकाका धम्मिका प्रसादलाई प्रशिक्षकमा निरन्तरता दिएको छ। यससँगै आगामी सिजनमा पनि टोलीको प्रशिक्षण र रणनीतिक नेतृत्व उहाँकै जिम्मामा रहने भएको छ। दायाँ हाते द्रुत बलर प्रसादले श्रीलंकाको राष्ट्रिय टोलीबाट टेस्ट, एकदिवसीय र टी–२० तीनै ढाँचामा अन्तर्राष्ट्रिय खेल खेल्नुभएको छ।

प्रशिक्षकका रूपमा उहाँले अमेरिकी राष्ट्रिय टोलीको सहायक तथा बलिङ प्रशिक्षकको जिम्मेवारी सम्हालिसक्नुभएको छ। नेपाल र ओमानको राष्ट्रिय टोलीमा पनि उहाँ बलिङ प्रशिक्षक रहिसक्नुभएको छ। लङ्का प्रिमियर लिगमा कोलम्बो किंग्सको बलिङ प्रशिक्षक, क्यान्डी बोल्ट्सको प्रशिक्षण निर्देशक र क्यान्डी रोयल्सको सहायक प्रशिक्षक भएर उहाँले काम गर्नुभएको छ।

केम्यान आईल्याण्डको म्याच ६० प्रतियोगितामा पनि उहाँको प्रशिक्षण अनुभव छ।