कालीगण्डकीले पोखरेबगरको पुल बगायो, म्याग्दीबाट मुस्ताङसँगको सडक सम्पर्क टुट्यो

बेनी–जोमसोम–कोरला सडकअन्तर्गत म्याग्दीको अन्नपूर्ण गाउँपालिका–६ पोखरेबगर र वडा नम्बर २ भुरुङ–तातोपानीको नौलीबगर जोड्ने पुल कालीगण्डकी नदीको बाढीले बगाएको छ।

अन्नपूर्ण गाउँपालिकाका अध्यक्ष भारतकुमार पुनका अनुसार पुल बगेपछि गाउँपालिकाका वडा नम्बर २, ३ र ४ का साथै मुस्ताङसँगको यातायात सम्पर्क विच्छेद भएको छ।

रसुवाको भोटेकोशीमा आएको बाढीपछि यो सडक वैकल्पिक मार्गका रूपमा प्रयोग हुँदै आएको थियो। पुल बगेपछि कोरला नाकासँगको सडक सम्पर्क पनि टुटेको छ।