२६औँ राष्ट्रिय आइटिएफ तेक्वान्दो विराटनगरमा, १७० खेलाडी सहभागी

२६औँ राष्ट्रिय आइटिएफ तेक्वान्दो प्रतियोगिता असोज २५ र २६ गते विराटनगरमा हुने भएको छ। मोरङ जिल्ला आइटिएफ तेक्वान्दो संघको आयोजना र कोशी प्रदेश खेलकुद विकास बोर्डको संयोजनमा हुने प्रतियोगितामा कुल १७० खेलाडीले प्रतिस्पर्धा गर्नेछन्। तीमध्ये पुरुषतर्फ ९० र महिलातर्फ ८० खेलाडी छन्।

बुधबार विराटनगरमा आयोजित पत्रकार सम्मेलनमा आयोजक संघका अध्यक्ष ओमकुमार श्रेष्ठले प्रतियोगितालाई व्यवस्थित र भव्य बनाउन तयारी तीव्र पारिएको बताउनुभएको छ। नेपाल अन्तर्राष्ट्रिय तेक्वान्दो महासंघका केन्द्रीय अध्यक्ष एवं कोशी प्रदेश खेलकुद विकास बोर्डका सदस्य प्रवीणकुमार कार्कीका अनुसार सातै प्रदेश र तीन विभागीय टोलीका खेलाडीले भाग लिनेछन्। प्रतियोगितामा पुरुष र महिला दुवैतर्फ एकल स्पारिङलगायतका विधा रहने आयोजकले जनाएको छ।