आईपीयू महासभामा नेपालले जलवायु विपद्बारे आपतकालीन प्रस्ताव लैजाने, सभामुख आज तान्जानिया प्रस्थान

सभामुख डोलप्रसाद अर्यालले अन्तर–व्यवस्थापिका सङ्घ, आईपीयूको १५३औँ महासभामा जलवायुजन्य विपद्सम्बन्धी आपतकालीन प्रस्ताव दर्ता गराउने बताउनुभएको छ। सिंहदरबारमा शुक्रबार आयोजित पत्रकार भेटघाटमा उहाँले आईपीयूको इतिहासमा नेपालले पहिलोपटक यस्तो प्रस्ताव लैजान लागेको जानकारी दिनुभयो। सभामुखका अनुसार परराष्ट्र मन्त्रालयमार्फत गरिएको समन्वयबाट करिब ५० देशको समर्थन जुटिसकेको छ।

महासभाका क्रममा विभिन्न देशका प्रतिनिधिमण्डलसँग २८ वटा छुट्टै बैठकको तयारी पूरा भएको उहाँले उल्लेख गर्नुभयो। नेपालले भोगेको प्राकृतिक विपद् र जलवायु न्यायको सवाललाई अन्तर्राष्ट्रिय बहसमा पुर्‍याउने योजना रहेको सभामुख अर्यालले बताउनुभएको छ। प्रधानमन्त्रीले संयुक्त राष्ट्रसङ्घमा राखेजस्तै धारणा आईपीयूमा पनि राख्ने उहाँको भनाइ छ।

संसद्मा ४० वर्षमुनिका सांसदको उपस्थिति करिब ३७ प्रतिशतभन्दा बढी रहेको विषय पनि महासभामा प्रस्तुत गरिने सभामुखले जनाउनुभएको छ। विदेश घुम्नकै लागि संसद् बैठक बन्द गरिएको भन्ने टिप्पणीप्रति सभामुखले आपत्ति जनाउनुभएको छ। यो सम्मेलन आफ्नो पहिलो आईपीयू भ्रमण भएको पनि उहाँले बताउनुभयो।

प्रस्थानअघि सभामुख अर्यालले शुक्रबार राष्ट्रपति रामचन्द्र पौडेललाई भेटेर महासभाको विषयमा जानकारी गराउनुभएको छ। सात सदस्यीय प्रतिनिधिमण्डलको नेतृत्व गर्दै सभामुख अर्याल आइतबार तान्जानिया प्रस्थान गर्दै हुनुहुन्छ। तान्जानियाको अरुशामा हुने सम्मेलनमा १८३ देशका सभामुख र सांसद सहभागी हुने बताइएको छ।