जनमत महाधिवेशन: अध्यक्षमा राउतको एकल उम्मेदवारी, उपाध्यक्षका लागि १४ जना

जनमत पार्टीको दोस्रो महाधिवेशनमा राष्ट्रिय अध्यक्ष पदका लागि डा. सीके राउतको मात्र उम्मेदवारी परेको छ। बिहीबार मनोनयन दर्ता भएपछि पार्टीको केन्द्रीय निर्वाचन समितिले शुक्रबार उम्मेदवारको प्रारम्भिक नामावली सार्वजनिक गरेको हो।

समितिको नामावलीमा अध्यक्षसहित सबै पदका लागि जम्मा १०३ जनाको नाम समेटिएको छ। अन्य पदमा भने प्रतिस्पर्धा हुने देखिएको छ। ७ उपाध्यक्ष पदका लागि १४ जनाले उम्मेदवारी दिएका छन्।

तीमध्ये रौतहटका बसन्तकुमार कुशवाहा, धनुषाकी अनिता साह, सिरहाकी अनिता मण्डल, सप्तरीका डा. जयकान्त राउत, बाराका डा. कमरुल्लाह अन्सारी र मोरङका परमेश्वर मुर्मु पनि छन्।

महासचिव पदमा ममता झा, चन्दनकुमार सिंह र संजयकुमार यादव उम्मेदवार छन्। उपमहासचिवमा निर्मलकुमार मण्डल र ललितचन्द्र मल्लिकबीच प्रतिस्पर्धा छ। त्यस्तै ७ सचिव पदका लागि १० जना र केन्द्रीय कार्यकारिणी सदस्यका लागि ७३ जना मैदानमा छन्।

निर्वाचन समितिको कार्यतालिकाअनुसार असोज ३ गते नामावलीउपर दाबी विरोध र असोज ४ गते उम्मेदवारी फिर्ता गर्न सकिनेछ। दुवै दिनको समय बिहान १० देखि साँझ ५ बजेसम्म तोकिएको छ। उम्मेदवारको अन्तिम नामावली असोज ५ गते प्रकाशित हुनेछ।

महाधिवेशन असोज ९ र १० गते वीरगञ्जमा हुँदैछ र १० गते उद्घाटन समारोहपछि मतदान हुनेछ। समितिका सदस्यसचिव राजेशकुमार मण्डलले निर्वाचनसम्बन्धी प्रक्रिया टुंग्याउने काम भइरहेको बताउनुभएको छ।