अफगानिस्तानविरुद्ध भारतको ३–० क्लिन स्वीप, अभिषेक शर्माको कीर्तिमान

भारतले तेस्रो तथा अन्तिम टी–ट्वान्टी अन्तर्राष्ट्रिय खेलमा अफगानिस्तानलाई १२७ रनले हराउँदै तीन खेलको शृङ्खलामा ३–० को क्लिन स्वीप पूरा गरेको छ। बिहीबार दिल्लीको अरुण जेटली स्टेडियममा पहिले ब्याटिङ गरेको भारतले २० ओभरमा ७ विकेटको नोक्सानीमा २२१ रन जोडेको थियो। जवाफमा अफगानिस्तानको पूरै टोली १४.१ ओभरमा ९४ रनमा समेटिएको थियो।

भारतीय ओपनर अभिषेक शर्माले जम्मा ३० बलमा करिअरकै तेस्रो टी–ट्वान्टी शतक पूरा गर्दै अन्तर्राष्ट्रिय टी–ट्वान्टीमा भारततर्फबाट सबैभन्दा छिटो शतकको कीर्तिमान बनाउनुभएको छ। टेस्ट खेल्ने मुलुकका खेलाडीमध्ये पनि यो नै अन्तर्राष्ट्रिय टी–ट्वान्टीको अहिलेसम्मकै छिटो शतक हो। यसअघि न्युजिल्यान्डका फिन एलेनले यसै वर्ष दक्षिण अफ्रिकाविरुद्ध ३३ बलमा शतक बनाएर यो कीर्तिमान राख्नुभएको थियो।

आईसीसीका एसोसिएट सदस्यसमेत गणना गर्दा भने यो तेस्रो छिटो शतक हो। यो सूचीमा साइप्रसविरुद्ध २७ बलमा शतक बनाउने एस्टोनियाका साहिल चौहान शीर्षमा हुनुहुन्छ। अभिषेकले ३४ बलमा ९ चौका र ११ छक्कासहित १०८ रन बनाउनुभयो, जसमध्ये १०२ रन बाउन्ड्रीबाट आएका थिए।

उहाँले सामना गरेको पहिलो बलमै छक्का प्रहार गर्नुभएको थियो। अफगानिस्तानतर्फ चार ब्याटर मात्र दोहोरो अंकमा पुग्न सके। कप्तान इब्राहिम जादरानको २५ रन टोलीकै उच्च व्यक्तिगत योगदान रह्यो।