कांग्रेसको १५औँ महाधिवेशन आजदेखि खुलामञ्चमा, ७,५०० भन्दा बढी प्रतिनिधि सहभागी हुने

नेपाली कांग्रेसको १५औँ महाधिवेशन आज आइतबारदेखि काठमाडौंको खुलामञ्चमा सुरु हुँदैछ। उद्घाटन समारोह दिउँसो २ बजे हुनेछ। असोज १८ देखि २२ गतेसम्म चल्ने महाधिवेशनमा देशभर र प्रवासबाट आएका ७ हजार ५ सयभन्दा बढी प्रतिनिधि सहभागी हुने कांग्रेसले जनाएको छ। उद्घाटन समारोहमा शीर्ष नेतादेखि विदेशी पाहुनासम्म सहभागी हुनेछन्।

भोलिदेखि हुने बन्दसत्र पनि खुलामञ्चमै हुनेछ। बन्दसत्रमा प्रस्तुत हुने प्रतिवेदनमाथिको छलफल सहभागीले डिजिटल बोर्डमार्फत प्रत्यक्ष हेर्न र सुन्न पाउनेछन्। विद्युतीय मेसिनबाट मतदान गराउँदा पनि नतिजा आउन एक दिनभन्दा बढी लाग्ने भन्दै नयाँ नेतृत्व चयनका लागि कागजी विधिबाट मतदान गराइने भएको छ।

गत विशेष महाधिवेशनबाट विधानमा गरिएको संशोधन लागू गर्दै यसपटक युवा, महिला तथा विभिन्न समुदायको प्रतिनिधित्वदेखि 'ल्याटरल इन्ट्री'सम्मका १८ नयाँ अभ्यास गरिँदैछ। महामन्त्री प्रदीप पौडेल महाधिवेशनस्थल पुगेर मञ्च व्यवस्थापनलगायतका तयारीको समन्वय गरिरहेका छन्।

पाँच दिनसम्म चल्ने महाधिवेशनले पार्टीको नयाँ वैचारिक दिशा तय गर्दै नयाँ कार्यसमिति चयन गर्नेछ।