पाल्पाको माथागढीमा पहिरोले घर पुरिँदा एक जनाको मृत्यु, तीन जना बेपत्ता

पाल्पाको माथागढी गाउँपालिकाका छुट्टाछुट्टै स्थानमा पहिरोले घर पुरिँदा एक जनाको मृत्यु भएको छ भने तीन जना बेपत्ता भएका छन्।

जिल्ला प्रहरी कार्यालय पाल्पाका अनुसार माथागढी गाउँपालिका–२ रुप्सेमा गएराति पहिरोले घर पुरिँदा ७५ वर्षीय शेरबहादुर चिदीको मृत्यु भएको हो।

यस्तै, सोही गाउँपालिकाको वडा नम्बर ३ भसकट्टामा आज बिहान पहिरो खस्दा स्थानीय लिलबहादुर घर्ती मगरको घर पुरिएको छ। घटनामा एकै परिवारका तीन जना बेपत्ता भएका छन्। अविरल वर्षाका कारण घरमाथिबाट पहिरो खसेको थियो।

बेपत्ता भएकाहरूको अवस्था अझै थाहा हुन सकेको छैन। अविरल वर्षाका कारण जिल्लाका विभिन्न स्थानमा पहिरोको जोखिम कायमै छ।