नेपाल–भारत परराष्ट्र सचिवस्तरीय वार्ता सम्पन्न, मिश्रीले अर्थमन्त्री वाग्लेलाई भेटे

काठमाडौं। नेपालका परराष्ट्र सचिव अमृतबहादुर राई र भारतका विदेश सचिव विक्रम मिश्रीबीच बुधबार काठमाडौंमा औपचारिक द्विपक्षीय वार्ता सम्पन्न भएको छ। वार्तामा उच्चस्तरीय भ्रमण, ऊर्जा र व्यापारसहित नेपाल–भारत सम्बन्धका समग्र पक्षबारे छलफल भएको परराष्ट्र मन्त्रालयले जनाएको छ। मिश्री परराष्ट्र सचिव राईको निमन्त्रणामा दुईदिने औपचारिक नेपाल भ्रमणमा छन्।

भ्रमणका क्रममा मिश्रीले बुधबार अर्थ मन्त्रालयमा अर्थमन्त्री डा. स्वर्णिम वाग्लेसँग शिष्टाचार भेटवार्ता गरेका छन्। भेटमा नेपाल–भारत आर्थिक सहकार्यका विषयमा छलफल भएको थियो। उनले ऊर्जा, जलस्रोत तथा सिँचाइमन्त्री विराज भक्त श्रेष्ठसँग पनि भेट गरेका छन्।

विदेश सचिव मिश्रीले भोटेकोशी बाढीबाट क्षतिग्रस्त नेपालको पूर्वाधार पुनर्निर्माण तथा पुनःस्थापनाका लागि सहयोग गर्न भारत तयार रहेको बताएका छन्। उनले प्रधानमन्त्रीको भारत भ्रमणमा हुनुपर्ने पहलबारे छलफल गर्न आफू उत्सुक रहेको पनि बताए।

मिश्रीले बिहीबार प्रधानमन्त्री बालेन्द्र शाहसँग भेटवार्ता गर्ने कार्यक्रम छ। गत आमचुनावपछि नेपाल भ्रमणमा आउने उनी भारतका सर्वोच्च कूटनीतिक अधिकारी हुन्।