आईजीपी कार्कीलाई हटाएर डा. मनोज केसी नियुक्त, ओलीले भने– अह्राएको काम गर्छन् भनेर बनाएको होला

काठमाडौं। सरकारले नेपाल प्रहरीका महानिरीक्षक (आईजीपी) दानबहादुर कार्कीलाई हटाएर अतिरिक्त महानिरीक्षक डा. मनोज केसीलाई नयाँ आईजीपी नियुक्त गरेको छ। बुधबार बसेको मन्त्रिपरिषद् बैठकले कार्कीलाई प्रधानमन्त्रीको सुरक्षा सल्लाहकारको जिम्मेवारी दिने निर्णय गरेको हो।

नियुक्तिलगत्तै केसी सिंहदरबारस्थित गृह मन्त्रालय पुगेका थिए। गृह मन्त्रालयका प्रवक्ता आनन्द काफ्लेका अनुसार ३४औँ आईजीपी केसीलाई बुधबार नै दर्ज्यानी चिह्न प्रदान गरिने कार्यक्रम राखिएको थियो।

कार्कीलाई सिधै बर्खास्त गर्दा कानुनी जटिलता आउन सक्ने भएकाले पदमुक्त नगरी प्रधानमन्त्री कार्यालय मातहत सारिएको सरकारको भनाइ छ। कार्की भने पुनर्बहालीका लागि रिट लिएर सर्वोच्च अदालत जाने तयारीमा रहेको थाहाखबरले जनाएको छ।

नेकपा एमालेका अध्यक्ष केपी शर्मा ओलीले बुधबार पार्टी कार्यालय च्यासलमा सञ्चारकर्मीको प्रश्नमा ‘उहाँहरूले अह्राएको काम गर्छन् भनेर बनाएको होला’ भनेका छन्। पूर्वप्रधानमन्त्री डा. बाबुराम भट्टराईले आईजीपी हेरफेर विधि र प्रक्रियाविपरीत भएको भए गलत हुने बताएका छन्। निर्णयपछि प्रमुख प्रतिपक्षी दल नेपाली कांग्रेसले आधिकारिक धारणा बनाउन शीर्ष नेताहरूको आकस्मिक बैठक बोलाएको थियो।