संविधान दिवसमा प्रचण्ड र लामिछानेको सन्देश: उपलब्धि जनजीवनसम्म, समीक्षा सीमान्तकृत केन्द्रित

संविधान दिवस २०८३ का अवसरमा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ र राष्ट्रिय स्वतन्त्र पार्टीका सभापति रवि लामिछानेले आज छुट्टाछुट्टै शुभकामना सन्देश जारी गर्नुभएको छ। संविधानका उपलब्धि जनताको दैनिक जीवनमा जोड्नु र बाँकी काम सम्पन्न गर्नु अहिलेको मुख्य जिम्मेवारी भएको संयोजक दाहालले बताउनुभएको छ। संघीय लोकतान्त्रिक गणतन्त्र, संविधान र जनताका अधिकार उल्टाउने प्रयासविरुद्ध लोकतान्त्रिक शक्ति एकजुट हुनुपर्ने उहाँको भनाइ छ।

शिक्षा, स्वास्थ्य, रोजगारी र उत्पादनमा सबै नागरिकको समान पहुँच सुनिश्चित गर्नुपर्नेमा पनि उहाँले जोड दिनुभएको छ। संविधान कानुनी दस्तावेज मात्र नभई जनताको त्याग र बलिदानले प्राप्त ऐतिहासिक उपलब्धि भएको उहाँले उल्लेख गर्नुभएको छ। सभापति लामिछानेले संविधानको आगामी समीक्षा समाजको तल्लो तहका सीमान्तकृत नागरिकलाई केन्द्रमा राखेर गरिनुपर्ने बताउनुभएको छ।

संविधान जीवित दस्तावेज भएकाले राजनीतिक अभ्यासबाट सिकेका पाठअनुसार यसमा सुधार र संशोधन गर्न सकिने उहाँको धारणा छ। आर्थिक समृद्धि, सामाजिक न्याय र सुशासनको आधार तयार पार्ने जिम्मेवारी अझै अधुरो रहेको उहाँले औँल्याउनुभएको छ। मौलिक हक सीमान्तकृत नागरिकको दैनिक अनुभव नबनेसम्म लोकतन्त्र स्थिर नहुने उहाँको भनाइ छ।

रास्वपाले सामाजिक लोकतन्त्रको बाटोबाट नागरिकलाई खुसी बनाउने र समाजमा न्याय स्थापना गर्ने अठोट लिएको उहाँले बताउनुभएको छ।