मनसुन बाहिरिन थाल्यो, बागमती, कोशी, गण्डकी र लुम्बिनीमा वर्षाको सम्भावना

नेपालबाट यस वर्षको मनसुन क्रमशः बाहिरिन थालेको छ। सुदूरपश्चिम र कर्णाली प्रदेश, लुम्बिनीको पश्चिमी धेरै ठाउँ तथा गण्डकीको पश्चिमी थोरै ठाउँबाट मनसुन बाहिरिसकेको छ।

जल तथा मौसम विज्ञान विभागको मौसम पूर्वानुमान महाशाखाका अनुसार कर्णाली र सुदूरपश्चिम प्रदेशको सबै भूभाग तथा गण्डकी र लुम्बिनी प्रदेशको पश्चिमी भूभागमा पश्चिमी वायुको प्रभाव रहेको छ। आज केही ठाउँमा हल्कादेखि मध्यम वर्षा हुने सम्भावना छ। बागमती, कोशी, गण्डकी र लुम्बिनी प्रदेशमा वर्षाको सम्भावना रहेको जनाइएको छ।

मनसुन बाहिरिने क्रम सुरु भएसँगै पूर्वी नेपालमा भारी वर्षा भएको छ। दिउँसो र साँझपख बादल लाग्ने तथा केही समय वर्षा हुने क्रम अझै रहने विभागले जनाएको छ।

विभागका अनुसार पश्चिम नेपालबाट यस वर्षको मनसुन बाहिरिसकेको भए पनि मनसुन बाहिरिनेबित्तिकै वर्षा रोकिने भने होइन।