अर्थ समितिमा सेयर बजारबारे छलफल, लगानीकर्ताले मागे नयाँ धितोपत्र ऐन

सेयर बजारमा कानुनी रिक्तता र दुई दशक पुरानो ऐनका कारण कुशासन बढेको भन्दै लगानीकर्ताहरूले समयअनुकूल नयाँ धितोपत्र ऐन तुरुन्त ल्याउन सरकारसँग माग गरेका छन्। नेपाल सेयर बजार लगानीकर्ता संघका महासचिव खगेन्द्रराज कँडेलले अर्थ मन्त्रालयले सेयर बजारबारे स्वार्थ समूहहरूसँग मात्र बढी सहकार्य गरिरहेको आरोप लगाए।

बुधबार बसेको संसद्को अर्थ समितिको बैठकमा सरोकारवालाहरूले पुँजी बजारमा आएको तीव्र गिरावट र लगानीकर्ताको घट्दो विश्वासप्रति चासो जनाए। संघका अध्यक्ष हरिबहादुर केसीले पुँजी बजारका समस्या समाधान गर्न तुरुन्त सेक्युरिटिज कमिसन गठन गर्न माग गरे। घनश्याम पाण्डेले संस्थापकको 'आईपीओ खेती' र कमजोर नियमनले जोखिम बढाएको बताए।

बजार विज्ञ अजयकुमार श्रेष्ठले पुँजी बजारका नीति लगानीकर्ताको हितभन्दा बढी ट्रेडिङ र छोटो अवधिको नाफामा केन्द्रित भएको बताए। नेपाल पुँजी बजार लगानीकर्ता संघका अध्यक्ष शिवप्रसाद चौलागाईंले आईपीओ र त्यसपछिको सेयर आपूर्ति व्यवस्थित गर्नुपर्नेमा जोड दिए। अनुसन्धानकर्ता दृष्टि पन्तले धितोपत्र बोर्डले ल्याएको इन्ट्राडे कारोबार अवधारणापत्रको दिशा राम्रो भए पनि कार्यान्वयनमा चुनौती रहेको बताइन्।

बैठकमा धितोपत्र बोर्डका अध्यक्ष डा. गोपालप्रसाद भट्टले प्रस्तुत गरेको विवरणअनुसार डिम्याट खाता खोल्नेको संख्या ८० लाख ९५ हजार पुगेको छ।