नारायणीमा भीषण बाढी: नारायणगढ किनारका करोडौँका संरचना बगे, बजार जोखिममा

नारायणी नदीमा आएको भीषण बाढीले नारायणगढ बजारसँगै जोडिएको नदीकिनारमा बनाइएका करोडौँ रुपैयाँका संरचना बगाएको छ। बाढीपछि नारायणगढ बजारसमेत जोखिममा परेको छ। खबरहबले यसलाई नारायणीमा ६० वर्षयताकै भीषण बाढी भनेको छ।

भरतपुर महानगरपालिकाले उद्योग वाणिज्य संघसँगैको नदी तटीय क्षेत्रलाई ‘सिबिच’ (समुद्री किनार) को ढाँचामा विकास गरी आकर्षक पर्यटकीय गन्तव्य बनाउने योजना अघि सारेको थियो। बाढीले संरचना बगाएपछि नदीकिनारलाई सुन्दर बनाउने भरतपुरवासीको सपना पूरा हुन नसक्ने देखिएको छ।

असोज ८ देखि चार दिनसम्म परेको वर्षा र नारायणीमा आएको बाढीका कारण भरतपुर महानगरपालिका–१ स्थित राष्ट्रिय आधारभूत प्राथमिक विद्यालयमा पनि क्षति पुगेको छ। बाढीले विद्यालयका कक्षाकोठामा क्षति पुर्‍याएपछि शिक्षक र विद्यार्थी सरसफाइमा जुटेका छन्।