आजको मौसम: काठमाडौंमा वर्षाको सम्भावना ६० प्रतिशत, कोशी–बागमतीका पहाडमा भारी वर्षा

जल तथा मौसम विज्ञान विभागले आज काठमाडौँमा वर्षा हुने सम्भावना ६० प्रतिशत रहेको जनाएको छ। विभागले बिहान आठ बजे जारी गरेको आगामी तीन दिनको पूर्वानुमानअनुसार असोज ७ देखि ९ सम्मको अवधिमा देशभर मनसुनी वायुसँगै पश्चिमी वायुको आंशिक प्रभाव रहेको छ। बङ्गालको खाडीको पश्चिम–मध्य भू–भाग आसपास रहेको न्यून चापीय क्षेत्र आगामी दिनमा थप शक्तिशाली बन्दै बलियो न्यून चापीय क्षेत्रको रूपमा पश्चिम–उत्तरपश्चिम दिशातर्फ सर्ने देखिएको विभागले उल्लेख गरेको छ।

आज कोशी, मधेश र बागमती प्रदेशसहित देशको हिमाली भू–भाग तथा गण्डकी र लुम्बिनी प्रदेशका पहाडी भू–भागमा साधारणतया बादल लाग्नेछ। कर्णाली र सुदूरपश्चिम प्रदेशका पहाडी भू–भागमा भने आंशिक बादल लाग्नेछ। कोशी प्रदेशको पहाडी र बागमती प्रदेशको पहाडी तथा तराई भू–भागको एक–दुई स्थानमा भारी वर्षाको सम्भावना छ।

मधेश प्रदेशलगायत तराईका केही स्थानमा मेघगर्जन र चट्याङसहित मध्यमसम्म वर्षा हुन सक्छ। काठमाडौँमा तापक्रम २७ देखि २९ डिग्री सेल्सियस, पोखरामा ३० देखि ३२ र विराटनगरमा ३३ देखि ३५ डिग्री सेल्सियस रहने प्रक्षेपण छ। पोखरा र विराटनगरमा पनि वर्षाको सम्भावना ६० प्रतिशत छ भने नेपालगञ्जमा ३० प्रतिशत छ।

भोलि देशभर साधारणतया बादल लाग्ने र कोशी तथा बागमती प्रदेशका पहाडी भू–भागको एक–दुई स्थानमा भारी वर्षा हुन सक्ने विभागले जनाएको छ।