पृथ्वी राजमार्गमा आज दिउँसो १ बजेदेखि सबै प्रकारका सवारीसाधन चल्ने

पृथ्वी राजमार्ग भएर बुधबार दिउँसो १ बजेदेखि सबै प्रकारका सवारीसाधन सञ्चालन हुने भएका छन्।

जिल्ला प्रशासन कार्यालय धादिङका अनुसार धादिङको कृष्णभीर, परेवाभीर र बाँगेमोड क्षेत्रमा खसेका पहिरोलगायतका अवरोध हटाएर सडक सञ्चालनमा ल्याउने तयारी गरिएको छ।

थप पहिरो नखसे र सडकमा अरू अवरोध नआए दिउँसो १ बजेदेखि राजमार्ग भएर चल्ने सबै सवारीसाधन पूर्ण रूपमा सञ्चालनमा आउने कार्यालयले जनाएको छ।

बाढी र पहिरोका कारण देशका प्रमुख राजमार्ग र सडकखण्ड प्रभावित हुँदा पृथ्वी राजमार्गमा पनि यातायात अवरुद्ध भएको थियो।