पश्चिमी वायुको आंशिक प्रभाव, हिमाली र पहाडी भेगमा हल्का वर्षा र हिमपातको सम्भावना

देशमा अहिले पश्चिमी वायुको आंशिक प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ। यसको असरले आज सोमबार देशका विभिन्न हिमाली तथा पहाडी क्षेत्रमा हल्का वर्षा र हिमपातको सम्भावना रहेको छ।

महाशाखाका अनुसार आज दिउँसो गण्डकी, कर्णाली र सुदूरपश्चिम प्रदेशका केही स्थानमा हल्का वर्षाको सम्भावना छ। सुदूरपश्चिम र कर्णाली प्रदेशका हिमाली र पहाडी भूभागका केही स्थानमा हल्का वर्षा तथा हिमाली क्षेत्रमा हिमपात हुन सक्ने महाशाखाले जनाएको छ।

त्यस्तै कोशी, बागमती र गण्डकी प्रदेशका हिमाली भूभागका एकदुई स्थानमा पनि हल्का वर्षा तथा हिमपातको सम्भावना रहेको महाशाखाले उल्लेख गरेको छ।

यसरी बागमतीसहित पाँचवटा प्रदेशका केही स्थानमा वर्षाको सम्भावना देखिएको छ। हिमाली क्षेत्रतर्फ यात्रा गर्नेहरूलाई मौसमको जानकारी लिएर मात्र हिँड्न मौसम पूर्वानुमानले संकेत गरेको छ।