जेनजी आन्दोलनका क्रममा कारागारबाट फरार कैदी सुनसरीमा घरबाटै पक्राउ

जेनजी आन्दोलनका क्रममा कारागारबाट फरार भएका जबर्जस्ती करणी मुद्दाका एक दोषी पक्राउ परेका छन्। सुनसरीको इनरुवा नगरपालिकाका २० वर्षीय आकाशकुमार खत्वेलाई प्रहरीले आइतबार पक्राउ गरेको हो।

खत्वेलाई उनकै घरबाट पक्राउ गरिएको हो। सुनसरी जिल्ला अदालतले २०८२ वैशाख ३ गते गरेको फैसलाअनुसार उनी कारागारमा कैद भुक्तान गरिरहेका थिए।

फरार हुनुअघि उनले एक वर्ष आठ महिना छ दिन कैद भुक्तान गरिसकेका थिए। जेनजी आन्दोलनका क्रममा उनी कारागारबाट भागेका थिए।

जेनजी आन्दोलनका बेला कारागारबाट फरार भएका कैदीबन्दीलाई प्रहरीले पक्राउ गर्ने क्रम जारी राखेको छ।