रौतहटमा स्रोत नखुलेको ४४ लाख ६४ हजार रुपैयाँसहित भारतीय नागरिक र व्यापारी पक्राउ

रौतहट प्रहरीले स्रोत नखुलेको ४४ लाख ६४ हजार ६०५ रुपैयाँ नगदसहित दुई जनालाई पक्राउ गरेको छ। नेपाल–भारत सीमा क्षेत्रबाट अवैध रूपमा चलिरहेको हुन सक्ने हुण्डी कारोबारको अनुसन्धानका क्रममा उनीहरू पक्राउ परेका हुन्।

प्रहरीका अनुसार भारतबाट नेपालतर्फ मोटरसाइकलमा आउँदै गरेका एक भारतीय नागरिकलाई ३० लाख रुपैयाँसहित पक्राउ गरिएको हो। उक्त रकम मोटरसाइकलको ट्याङ्कीमुनि गोप्य खण्ड (फल्स बटम) बनाएर लुकाइएको थियो।

प्रहरीले उक्त रकम गौरस्थित एक व्यापारीकहाँ पुर्‍याउनुपर्ने बताएको छ। सोही व्यापारीलाई पनि पक्राउ गरिएको छ। दुवैबाट बरामद भएको रकमको जम्मा स्रोत खुलेको छैन।

पक्राउ परेका दुवै जनामाथि अनुसन्धान भइरहेको छ। हुण्डी कारोबारमा संलग्न अरू व्यक्तिको खोजी पनि जारी रहेको प्रहरीले जनाएको छ।