विदेशी विनिमय सञ्चिति ४० खर्ब नाघ्यो, दुई महिनामा ४ खर्ब ३६ अर्ब रेमिट्यान्स

नेपाल राष्ट्र बैंकले बिहीबार चालु आर्थिक वर्ष २०८३/८४ को पहिलो दुई महिनाको देशको वर्तमान आर्थिक तथा वित्तीय स्थितिसम्बन्धी प्रतिवेदन सार्वजनिक गरेको छ। प्रतिवेदनअनुसार भदौसम्म विदेशी विनिमय सञ्चिति ४० खर्ब ६५ अर्ब ७८ करोड रुपैयाँ पुगेको छ।

गत असार मसान्तमा ३८ खर्ब ९७ अर्ब ६७ करोड रुपैयाँ रहेको सञ्चिति दुई महिनामा ४.३ प्रतिशतले बढेको हो। अमेरिकी डलरमा सञ्चिति ४.६ प्रतिशतले बढेर २६ अर्ब ४८ करोड पुगेको छ। यो सञ्चिति १७.८ महिनाको वस्तु तथा सेवा आयात धान्न पर्याप्त रहेको राष्ट्र बैंकले जनाएको छ।

दुई महिनामा ४ खर्ब ३६ अर्ब रुपैयाँभन्दा बढी रेमिट्यान्स भित्रिएको छ, जुन २३.९ प्रतिशतले बढी हो। भदौ महिनामा मात्रै २ खर्ब २१ अर्ब ३१ करोड रुपैयाँ रेमिट्यान्स भित्रिएको छ। सोही अवधिमा बैंक तथा वित्तीय संस्थाले निजी क्षेत्रमा ९३ अर्ब ५२ करोड रुपैयाँ कर्जा लगानी गरेका छन्।

बाह्य क्षेत्र बलियो देखिए पनि उपभोक्ता महँगी र वैदेशिक व्यापार घाटा भने बढेको छ। भदौमा उपभोक्ता मुद्रास्फीति ६.३४ प्रतिशत पुगेको छ, जुन गत आर्थिक वर्षको भदौमा १.८७ प्रतिशत थियो।