आज र भोलि धेरै ठाउँमा भारी वर्षा, काठमाडौँमा वर्षाको सम्भावना ८० प्रतिशत

जल तथा मौसम विज्ञान विभागले आज र भोलि देशका धेरै ठाउँमा मेघगर्जन र चट्याङसहित वर्षा हुने पूर्वानुमान जारी गरेको छ। विभागका अनुसार आज कोशी, बागमती, गण्डकी र लुम्बिनी प्रदेशका थोरै स्थान तथा मधेशका एक–दुई स्थानमा भारीदेखि धेरै भारी वर्षा हुन सक्छ। कोशीदेखि लुम्बिनीसम्मका हिमाली र पहाडी भेगका अधिकांश स्थानमा मध्यम वर्षा वा हिमपात हुन सक्छ।

भोलि लुम्बिनी र गण्डकी प्रदेशका एक–दुई स्थानमा अति भारी वर्षाको सम्भावना छ। काठमाडौँमा आज वर्षाको सम्भावना ८० प्रतिशत छ र भारी वर्षा हुन सक्छ। राजधानीको तापक्रम १८ देखि २० डिग्री सेल्सियसको बीचमा रहने अनुमान छ।

पोखरामा पनि उस्तै तापक्रम र ८० प्रतिशत वर्षाको सम्भावना छ। विराटनगर र नेपालगञ्जमा २३ देखि २५ डिग्री तथा वीरेन्द्रनगरमा २१ देखि २३ डिग्री सेल्सियस तापक्रम रहने अनुमान छ। जनकपुरमा वर्षाको सम्भावना ७० प्रतिशत छ।

मधेश तथा कोशी, बागमती, गण्डकी र लुम्बिनीको तराईका केही स्थानमा हावाहुरी चल्न सक्ने विभागले जनाएको छ। बङ्गालको खाडीमा बनेको बलियो न्यून चापीय क्षेत्र भारतको उत्तरी आन्ध्र प्रदेश र दक्षिणी ओडिशा नजिक रहेको छ। मनसुनी वायुसँगै पश्चिमी वायुको आंशिक प्रभाव पनि देशभर परेको छ।

उक्त प्रणाली आगामी २४ घण्टामा उत्तर–उत्तरपश्चिमतर्फ सर्दै कमजोर हुने विभागको अनुमान छ।