विभिन्न १३ देशका लागि प्रस्तावित राजदूतको संसदीय सुनुवाइ आजदेखि सुरु

प्रतिनिधिसभाअन्तर्गतको संसदीय सुनुवाइ समितिमा विभिन्न १३ देशका लागि प्रस्तावित राजदूतहरूको सुनुवाइ प्रक्रिया आजदेखि सुरु हुँदैछ।

संघीय संसद सचिवालयका अनुसार सुनुवाइ समितिको बैठक आज बिहान सवा ११ बजे बस्नेछ। बैठकमा प्रस्तावित राजदूतहरूमाथि प्राप्त उजुरी समितिका सदस्यहरूलाई वितरण गरिनेछ।

आज संसदीय सुनुवाइ समितिसहित तीन वटा संसदीय समितिको बैठक बस्दैछ। हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समिति र सार्वजनिक नीति तथा प्रत्यायोजित विधायन समितिको बैठक पनि आजै तय गरिएको छ।

राजदूतका रूपमा प्रस्तावित व्यक्तिहरूको सुनुवाइ संसदीय सुनुवाइ समितिबाट हुने व्यवस्थाअनुसार यो प्रक्रिया अघि बढाइएको हो।