सुनकोशी–मरिण आयोजनाको ठेक्का प्रक्रिया संशोधित कानुनअनुसार तत्काल सुरु गर्न प्रधानमन्त्री कार्यालयको निर्देशन

प्रधानमन्त्री तथा मन्त्रिपरिषद्को कार्यालयले सुनकोशी–मरिण डाइभर्सन बहुउद्देश्यीय राष्ट्रिय गौरवको आयोजनाको ठेक्का प्रक्रिया संशोधित ऐन तथा नियमावलीअनुसार तत्काल सुरु गर्न निर्देशन दिएको छ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा सोमबार बिहान बसेको बैठकमा उक्त निर्देशन दिइएको हो। बैठकमा सम्बन्धित मन्त्रालयले राष्ट्रिय गौरवको आयोजनालाई निर्धारित समयमै सम्पन्न गर्ने प्रतिबद्धता जनाएको छ।

नयाँ कानुनी व्यवस्था लागू भइसकेको अवस्थामा पुरानो प्रावधानका आधारमा खरिद प्रक्रिया अघि बढाइनुले आयोजनाको कानुनी अनुपालनमाथि प्रश्न उठेको थियो। सोही कारण पुरानो प्रावधानअनुसारको प्रक्रिया अघि नबढाई संशोधित ऐन र नियमावलीबमोजिम ठेक्का प्रक्रिया सुरु गर्न कार्यालयले निर्देशन दिएको हो।

सुनकोशी–मरिण डाइभर्सन आयोजना सरकारले राष्ट्रिय गौरवको आयोजनाका रूपमा अघि बढाएको बहुउद्देश्यीय आयोजना हो।