गहिरो न्यून चापको प्रभाव: भोलि कोशी र बागमतीका पहाडमा धेरै भारी वर्षा

बङ्गालको खाडीमा रहेको गहिरो न्यून चापीय क्षेत्रको प्रभावले भोलि कोशी र बागमती प्रदेशको पहाडी भू-भागका एक-दुई स्थानमा धेरै भारी वर्षा हुने जल तथा मौसम विज्ञान विभागले जनाएको छ। विभागले आज जारी गरेको विवरणअनुसार यो प्रणाली हाल पश्चिम-मध्य तथा आसपासको उत्तर-पश्चिमी बंगालको खाडीमा रहेको छ र आगामी दिनमा थप शक्तिशाली बन्दै पश्चिम-उत्तरपश्चिम दिशातर्फ सर्ने देखिएको छ। देशभर मनसुनी वायुसँगै पश्चिमी वायुको आंशिक प्रभाव समेत रहेको उल्लेख छ।

भोलि कोशी, बागमती र गण्डकी प्रदेशका थोरै स्थान तथा मधेश र लुम्बिनी प्रदेशका एक-दुई स्थानमा भारी वर्षाको सम्भावना छ। मधेश प्रदेश तथा कोशी प्रदेशको तराईका थोरै स्थानमा हावाहुरी चल्न सक्छ। आज कोशी प्रदेशको हिमाली, पहाडी र तराई भू-भाग तथा बागमतीको पहाडी र तराईका एक-दुई स्थानमा भारी वर्षाको सम्भावना छ।

विभागको सहरी पूर्वानुमानअनुसार काठमाडौँमा तापक्रम १९ देखि २१ डिग्री सेल्सियस र वर्षाको सम्भावना ६० प्रतिशत छ। विराटनगरमा २५ देखि २७ डिग्रीसँगै ७० प्रतिशत, जनकपुरमा २४ देखि २६ डिग्रीसँगै ६० प्रतिशत र पोखरामा १९ देखि २१ डिग्रीसँगै ४० प्रतिशत वर्षाको सम्भावना रहेको जनाइएको छ। नेपालगञ्ज र वीरेन्द्रनगरमा पनि मेघगर्जनसहित मध्यमसम्मको वर्षा हुने पूर्वानुमान छ।