एनपीएल खेल्न दक्षिण अफ्रिकी ब्याटर डेभिड मिलर काठमाडौँ आइपुगे

कर्णाली याक्समा अनुबन्ध भएका दक्षिण अफ्रिकाका चर्चित ब्याटर डेभिड मिलर नेपाल आइपुगेका छन्। तेस्रो संस्करणको नेपाल प्रिमियर लिग (एनपीएल) मा सहभागी हुन उनी बुधबार बिहान त्रिभुवन अन्तर्राष्ट्रिय विमानस्थलमा उत्रिएका हुन्।

विमानस्थलमा कर्णाली याक्स स्पोर्ट्सका प्रतिनिधिले मिलरलाई स्वागत गरेका थिए। टेस्ट खेल्ने राष्ट्र दक्षिण अफ्रिकाका यी ब्याटरले एनपीएलमा कर्णाली याक्सबाट खेल्नेछन्।

मिलर बुधबार नेपाल आउने कुरा बिहानै सार्वजनिक भएको थियो। उनको आगमनसँगै कर्णाली याक्सले अनुबन्ध गरेका विदेशी खेलाडी प्रतियोगिताका लागि काठमाडौँ आइपुगेका हुन्।

राजधानीमा अहिले नेपाल प्रिमियर लिगको तेस्रो संस्करण चलिरहेको छ। अनुबन्धअनुसार मिलर अब बाँकी खेलमा कर्णाली याक्सका लागि मैदान उत्रिनेछन्।