रिहाइपछि ध्रुव राठीको आरोप: प्रहरीले अपहरण गर्‍यो, सीजेपी आन्दोलन जारी

भारतका चर्चित युट्युबर ध्रुव राठीले प्रहरी नियन्त्रणबाट छुटेपछि आफूलाई पक्राउ होइन, अपहरण गरिएको आरोप लगाउनुभएको छ। मुख्य निर्वाचन आयुक्त ज्ञानेश कुमारको राजीनामा माग्दै कक्रोच जनता पार्टी अर्थात् सीजेपीले नयाँदिल्लीको जन्तरमन्तरमा गर्न लागेको प्रदर्शनअघि शनिबार बिहान गुरुग्रामस्थित घरबाट उहाँलाई लगिएको थियो। अधिकारीहरूका अनुसार आइतबार बिहान करिब ३ बजे उहाँलाई छाडेर परिवारको जिम्मा लगाइएको छ।

उहाँलाई करिब २२ देखि २४ घण्टासम्म हिरासतमा राखिएको थियो। सामाजिक सञ्जालमा सार्वजनिक भिडियोमा राठीले सादा पोसाकका मानिसहरू आमालाई धकेल्दै घरभित्र पसेर सुत्ने कोठाबाटै आफूलाई लगेको दाबी गर्नुभएको छ। लैजानेहरूले वर्दी र नाम पट्टिका नदेखाएकाले यसलाई अपहरण भनेको उहाँको भनाइ छ।

आफू विदेशी राहदानीधारी भएकाले प्रदर्शनमा भाग लिन नपाउने भन्ने हल्ला खण्डन गर्दै उहाँले भारतीय राहदानी देखाउनुभएको छ। सीजेपी नेता अभिजित दीपके, सौरभ दास र आशुतोष राङ्का पनि आइतबार रिहा भएका छन्। शनिबार दिल्लीका विभिन्न ठाउँबाट करिब ७ हजार प्रदर्शनकारी नियन्त्रणमा लिइएको अनुमान छ।

आइतबार पनि जन्तरमन्तर बन्द राखिएको छ र राजधानीका सीमामा अवरोध खडा गरिएको छ। प्रदर्शनको नेतृत्व गरिरहेका अजिंक्य सिन्धेले ज्ञानेश कुमारले राजीनामा नदिएसम्म आन्दोलन नरोकिने बताउनुभएको छ।