आन्ध्र प्रदेशमा गुगलको एआई डाटा सेन्टरविरुद्ध स्थानीयको विरोध

भारतको आन्ध्र प्रदेशस्थित विशाखापटनममा गुगलले बनाउन लागेको कृत्रिम बौद्धिकता अर्थात् एआई डाटा सेन्टरविरुद्ध स्थानीय बासिन्दाको विरोध चर्किएको छ। करिब १५ अर्ब अमेरिकी डलर लगानीको यो परियोजना अमेरिकाबाहिर गुगलकै सबैभन्दा ठूलो डाटा सेन्टर हुनेछ। भारतले यसलाई आफ्नो प्रविधि क्षेत्र फैलाउने ठूलो योजनाको मुख्य अंग मानेको छ।

स्थानीयले यसले पानी र बिजुलीमा दबाब बढाउने, वातावरण बिगार्ने र तुलनात्मक रूपमा कम रोजगारी दिने चिन्ता जनाएका छन्। निर्माणका लागि जङ्गल र खेतीयोग्य जमिन सफा गर्न थालिएको छ। किसान चन्दाला सदाम्माले आँप र काजुका रूख भएको ठाउँमा अहिले रातो माटो मात्र देखिएको बताउनुभएको छ।

दुई एकड जमिनबापत ८२ हजार डलरभन्दा बढी क्षतिपूर्ति पाए पनि कम्पनीले कुनै सम्मान नदेखाई जमिन लिएको उहाँको गुनासो छ।