पत्रकार पक्राउ: प्रेस काउन्सिलले रिहाइ माग्यो, प्रधानमन्त्री सचिवालयले संलग्नता नकार्‍यो

सादा पोसाकका प्रहरी विभिन्न सञ्चारमाध्यमका समाचार कक्षमै पसेर पत्रकारलाई नियन्त्रणमा लिएकोमा प्रेस काउन्सिल नेपालले गम्भीर आपत्ति जनाएको छ। शुक्रबार आकस्मिक बैठक बसेको काउन्सिलका अनुसार पक्राउको स्पष्ट कारण खुलाइएको छैन र पक्राउ पुर्जी देखाइएको छैन। अदालतको अनुमति लिइएको पनि देखिँदैन। त्यसैले काउन्सिलले पक्राउको कानुनी आधार सार्वजनिक गर्न र कानुनी आधारबिना नियन्त्रणमा राखिएका पत्रकारलाई रिहा गर्न माग गरेको छ।

यसैबीच उपत्यका अपराध अनुसन्धान कार्यालयको टोलीले डीएनए खबरका प्रधानसम्पादक धिरज बस्नेतलाई पनि पक्राउ गरेको छ। सेतोपाटीका अनुसार एकै दिन तीन पत्रकार पक्राउ परेका छन् र थप तीन जनाको खोजी भइरहेको छ। नेपाल प्रेसका अध्यक्ष लम्साल र प्रधानसम्पादक पौडेल प्रहरीले फोन गरेपछि साइबर ब्युरो पुगेका छन्। रातोपाटीका अनुसार बिचौलिया इनम सापकोटासँग हाइप्रोफाइल व्यक्ति जोडिएको विषय सार्वजनिक भएपछि धरपकड सुरु भएको हो।

प्रधानमन्त्री बालेन्द्र शाहको सचिवालयले यस घटनाक्रममा प्रधानमन्त्री, सचिवालय र प्रधानमन्त्री तथा मन्त्रिपरिषद्को कार्यालयको कुनै संलग्नता नभएको र आफूहरूलाई यसबारे जानकारी पनि नभएको बताएको छ। गृह मन्त्रालयका प्रवक्ता आनन्द काफ्लेले भने आफूलाई जानकारी छैन भन्न नसक्ने तर थप बुझ्नुपर्ने बताएका छन्।

नेपाल पत्रकार महासंघ, नेपाल बार एसोसिएसन तथा नेकपा एमाले, नेपाली कम्युनिस्ट पार्टी र नेपाली कांग्रेसका नेताहरूले पनि घटनाको विरोध गरेका छन्। सत्तारुढ रास्वपाका प्रवक्ता जगदीश खरेलले समाचार लेखेकै आधारमा पत्रकार पक्राउ गर्नु पार्टीको नीति र संविधानविपरीत भएको भन्दै यसबारे प्रहरीसँग जवाफ माग्ने बताएका छन्।