गण्डकीका दुर्गम अस्पतालमा ४६ मेडिकल अधिकृत खटाइए

गण्डकी प्रदेश सरकारले प्रदेश लोक सेवा आयोगको सिफारिसमा ४६ जना मेडिकल अधिकृत नियुक्त गरी प्रदेशका १४ अस्पतालमा खटाएको छ। प्रदेश सरकारका अनुसार चिकित्सकलाई योग्यताक्रमका आधारमा अस्पताल तोकिएको हो। मुस्ताङ र मनाङजस्ता हिमाली जिल्लाका अस्पतालमा लामो समयदेखि स्थायी मेडिकल अधिकृत थिएनन्।

प्रदेशका जिल्ला अस्पतालहरू छात्रवृत्तिमा पढेका र करारमा राखिएका चिकित्सकको भरमा चल्दै आएका थिए। अस्पताल प्रमुखको जिम्मा लिने स्थायी चिकित्सक भेट्टाउनसमेत कठिन थियो। स्याङ्जा, मनाङ, मुस्ताङ तथा मातृ तथा शिशु अस्पतालमा प्रमुखको जिम्मा स्वास्थ्य सहायक वा स्टाफ नर्सलाई दिनुपर्ने अवस्था थियो।

प्रदेश सरकारका अनुसार संघीयता सुरु हुँदा गण्डकीमा करिब १० जना मेडिकल अधिकृत मात्र समायोजन भएका थिए। अहिले विशेषज्ञसहित चिकित्सकको सङ्ख्या करिब २५० र नर्सिङ कर्मचारीको सङ्ख्या करिब ५०० पुगेको प्रदेश सरकारले जनाएको छ। पहिले १५ शय्याका जिल्ला अस्पतालमा एक विशेषज्ञ र दुई मेडिकल अधिकृत मात्र हुने गरेका थिए।

प्रदेश सरकारका अनुसार अहिले ती अस्पतालमा ११ विशेषज्ञ र १२ मेडिकल अधिकृतको दरबन्दी स्वीकृत भएको छ। प्रदेश सरकारले विभिन्न अस्पताललाई प्रदेशस्तरमा स्तरोन्नति गरेको छ र आफ्नै पहलमा सरुवा तथा संक्रामक रोग अस्पताल पनि स्थापना गरेको छ।