बाबुराम भट्टराईको सुझाव: प्रत्यक्ष निर्वाचित कार्यकारी राष्ट्रपति र पूर्ण समानुपातिक प्रणाली

पूर्वप्रधानमन्त्री डा. बाबुराम भट्टराईले राजनीतिक दलहरू सरकार बनाउने र ढाल्ने खेलमा मात्र सीमित हुँदा मुलुकले अपेक्षित आर्थिक समृद्धि हासिल गर्न नसकेको र त्यसको परिणामस्वरूप जनता तथा युवामा असन्तुष्टि बढेको बताएका छन्। आइतबार काठमाडौँको खुलामञ्चमा कांग्रेसको १५औँ महाधिवेशनको उद्घाटन सभालाई सम्बोधन गर्दै उनले यस्तो बताएका हुन्।

भट्टराईले आगामी १० देखि २० वर्षमा देशलाई कहाँ पुर्‍याउने भन्ने दीर्घकालीन साझा योजना बनाएर त्यसको कार्यान्वयनमा दलहरूबीच प्रतिस्पर्धा हुनुपर्ने प्रस्ताव गरे। मलेसिया, दक्षिण कोरिया, सिंगापुर र चीनले छोटो समयमै विकासमा ठूलो फड्को मारेको उदाहरण दिँदै उनले नेपालले पनि सोहीअनुसार योजना बनाउनुपर्ने बताए।

उनले दलहरूलाई प्रत्यक्ष निर्वाचित कार्यकारी राष्ट्रपति र पूर्ण समानुपातिक निर्वाचन प्रणालीतर्फ लाग्न सुझाव दिए। 'कि त हामीले संविधान संशोधन गरेर प्रत्यक्ष निर्वाचित कार्यकारी राष्ट्रपति प्रणालीमा र पूर्ण समानुपातिक संसदमा जाऔँ। त्यसो भयो भने बल्ल पाँच वर्ष चल्ने सरकार बन्न सक्छ,' उनले भने। गणतन्त्र, संघीयता, धर्मनिरपेक्षता र समावेशी लोकतन्त्रमध्ये कुनै एउटा खम्बा ढलेमा पूरै संविधान ढल्ने खतरा हुने भन्दै उनले संविधानमा छेडखानी नगरी आवश्यक सुधार मात्र गर्नुपर्नेमा जोड दिए।

कांग्रेसमा नयाँ नेतृत्व आउँदा खुसी लागेको बताउँदै भट्टराईले आफ्नो पुस्ता राजनीतिक नेतृत्वबाट बिदा भएर नयाँ पुस्तालाई मौका दिनुपर्ने धारणा राखे।