जेन–जी आन्दोलनका सहिद परिवार र घाइतेलाई स्नातकसम्म निःशुल्क शिक्षा

सरकारले जेन–जी आन्दोलनका सहिद परिवार तथा गम्भीर र अति गम्भीर घाइतेलाई स्नातक तहसम्म निःशुल्क शिक्षा दिने व्यवस्था गरेको छ। शिक्षा तथा खेलकुद मन्त्रालयले ‘जेन–जी आन्दोलनका सहिद परिवार तथा घाइतेलाई निःशुल्क शिक्षा प्रदान गर्नेसम्बन्धी मापदण्ड, २०८३’ स्वीकृत गर्दै यो सुविधा कार्यान्वयनमा ल्याएको हो। सहिदका छोराछोरी र सहोदर दाजुभाइ–दिदीबहिनी तथा गम्भीर एवं अति गम्भीर घाइतेको परिचयपत्र पाएका व्यक्ति लाभग्राही हुनेछन्।

आधारभूत तहका कक्षा १ देखि ५ र कक्षा ६ देखि ८ का लाभग्राहीले निःशुल्क पढाइसँगै पोशाक र पाठ्यसामग्री खरिदका लागि स्थानीय तहमार्फत नगद अनुदान पाउने प्रस्ताव छ। माध्यमिक तहअन्तर्गत कक्षा ९ र १० तथा कक्षा ११ र १२ का लागि पनि पोशाक र सिकाइ सामग्रीबापत नगद सहयोग तोकिएको छ। स्नातक तहका लागि सबै विश्वविद्यालयले दिने छात्रवृत्ति कोटामध्ये निश्चित कोटा लाभग्राहीलाई आरक्षण गर्नुपर्नेछ।

निजी विद्यालयले कानुनअनुसार दिनुपर्ने छात्रवृत्ति कोटामा पनि यस्ता लाभग्राहीलाई प्राथमिकता दिइनेछ। यस व्यवस्थामार्फत लाभग्राहीको शिक्षामा समान पहुँच सुनिश्चित गर्ने नीति सरकारले लिएको छ।