भोटेकोशी–त्रिशूली विपद् पुनर्निर्माणका लागि ४ देखि ५ अर्ब डलर जुटाउने सरकारको तयारी

भोटेकोशी–त्रिशूली विपद्पछिको पुनर्निर्माण र पुनर्स्थापनाका लागि चाहिने ४ देखि ५ अर्ब अमेरिकी डलर जुटाउने प्रक्रिया सरकारले सुरु गरेको छ। अर्थमन्त्री डा. स्वर्णिम वाग्लेले पुनर्निर्माणका लागि ४.७ देखि ५ अर्ब डलरसम्म लाग्ने प्रारम्भिक अनुमान सार्वजनिक गरेका हुन्।

सरकारले यसका लागि भारत, चीन, विश्व बैंक र एसियाली विकास बैंक (एडीबी) सँग वित्तीय प्याकेज तयार गर्दै छ। आवश्यक रकमको ८० प्रतिशत यिनै स्रोतबाट जुटाउने लक्ष्य राखिएको छ। लस एन्ड ड्यामेज फन्डबाट २ करोड अमेरिकी डलर अनुदान पाउने पनि बताइएको छ।

अर्थमन्त्री वाग्लेले पुनर्निर्माणको काम बजेटको सीमाभित्रै रहेर गर्ने प्रतिबद्धता जनाएका छन्। उनले चालु आर्थिक वर्षमा ७/८ अर्ब रुपैयाँ अनुदान प्राप्त गर्न पनि गाह्रो अवस्था रहेको बताए।

रसुवा बाढीले पुर्‍याएको क्षति तथा राहत र उद्धारका विषयमा बोल्ने क्रममा अर्थमन्त्रीले यस्तो जानकारी दिएका हुन्।