उद्योग वाणिज्य महासङ्घ: व्यापार सहजीकरण व्यवहारमा, बाढीले रोजगारी गुम्यो

नेपाल उद्योग वाणिज्य महासङ्घले रसुवा बाढीले करिब १२ हजार १ सय जनाको रोजगारी खोसेको निष्कर्षसहितको प्रतिवेदन सार्वजनिक गरेको छ। महासङ्घले बुधबार काठमाडौँमा देशको वर्तमान आर्थिक अवस्था र निजी क्षेत्रको सम्भावनाबारे गरेको अन्तरक्रियामा उक्त प्रतिवेदन सार्वजनिक गरिएको हो। भदौ १० गते रसुवाको भोटेकोसीमा आएको हिमाली बाढीपछि प्रभावित क्षेत्रको आर्थिक तथा सामाजिक अवस्था अध्ययन गरेर प्रतिवेदन तयार पारिएको महासङ्घले जनाएको छ।

महासङ्घको प्रतिवेदनअनुसार बाढीबाट करिब ५७० व्यावसायिक फर्म तथा कम्पनी प्रत्यक्ष प्रभावित भएका छन्। सोही कार्यक्रममा महासङ्घका अध्यक्ष अञ्जन श्रेष्ठले व्यापार सहजीकरण कागजमा मात्र सीमित नराखी व्यवहारमै लागू गर्नुपर्ने बताउनुभएको छ। उहाँका अनुसार अहिले सहजीकरणका धेरै काम कागजी प्रक्रियामै सीमित छन्, तर निजी क्षेत्र प्रक्रियागत झन्झटको अन्त्य र व्यवहारमै परिवर्तनको अनुभूति चाहन्छ।

अध्यक्ष श्रेष्ठले खर्च प्रणाली आधुनिक बनाउन, डिजिटल प्रणालीमा आधारित एकीकृत व्यापार प्रक्रिया अपनाउन र भरपर्दो लजिस्टिक पूर्वाधार निर्माण गर्न सरकार अग्रसर हुनुपर्ने बताउनुभयो। सीमापार भुक्तानी र सीमापार ढुवानीलाई पनि भरपर्दो बनाउनुपर्ने उहाँको माग छ। अर्थतन्त्रको मेरुदण्ड मानिने साना तथा मझौला उद्योग अहिले गम्भीर संकटमा रहेको भन्दै उहाँले ती उद्योगका समस्या तुरुन्त समाधान गर्न सरकारसँग आग्रह गर्नुभएको छ।