तिब्बतमा ७ म्याग्निच्युडको भूकम्प, कम्तीमा १६ जनाको मृत्यु, ३२ घाइते

चीनको तिब्बत (सिजाङ स्वायत्त क्षेत्र) मा ७ म्याग्निच्युडको शक्तिशाली भूकम्प जाँदा कम्तीमा १६ जनाको मृत्यु भएको छ। भूकम्पमा अन्य ३२ जना घाइते भएका छन्।

चीनको सरकारी समाचार संस्था सिन्ह्वाका अनुसार भूकम्प बिहीबार राति स्थानीय समयअनुसार १० बजेर ३३ मिनेटमा गएको थियो। भूकम्पको केन्द्र उत्तरी तिब्बतको नाग्छु क्षेत्रस्थित एक उच्च हिमाली काउन्टीमा रहेको थियो।

भूकम्प जमिनको सतहबाट १० किलोमिटर गहिराइमा गएको जनाइएको छ। स्थानीय आपत्कालीन व्यवस्थापन ब्युरोले मृतक र घाइतेको संख्या सार्वजनिक गरेको छ।

उक्त क्षेत्र दुर्गम हिमाली भूभागमा पर्छ। अहिलेसम्म आएको विवरण प्रारम्भिक भएकाले क्षतिको विवरण थप आउन बाँकी छ।