कांग्रेसमा वरिष्ठ उपसभापति पद थपियो, तीन महामन्त्री र १५ सहमहामन्त्री हुने

नेपाली कांग्रेसले १५औँ महाधिवेशनबाट पदाधिकारीमा वरिष्ठ उपसभापति पद थप्ने भएको छ। सोमबार महाधिवेशनस्थल खुलामञ्चमा बन्दसत्र सुरु हुनुअघि बसेको केन्द्रीय समिति बैठकले विधान संशोधन गर्दै यो निर्णय गरेको हो। यसअघि कांग्रेसका पदाधिकारीमा सभापति, उपसभापति, महामन्त्री, सहमहामन्त्री र कोषाध्यक्ष मात्र थिए।

नयाँ व्यवस्थाअनुसार कांग्रेसमा वरिष्ठ उपसभापतिसहित चार जना उपसभापति हुनेछन्, जसमध्ये एक महिला अनिवार्य हुनेछन्। महामन्त्री तीन जना हुने र तीमध्ये पनि एक महिला अनिवार्य हुने व्यवस्था गरिएको छ। सहमहामन्त्रीको संख्या ८ बाट १५ पुर्‍याइएको छ। तीमध्ये समावेशिताका आधारमा ९, खुलाबाट २ र सभापतिले मनोनीत गर्ने ४ जना हुनेछन्। रातोपाटीका अनुसार पदाधिकारीको संख्या १४ बाट बढाएर २३ पुर्‍याइएको छ।

केन्द्रीय समितिको आकार पनि बढाइएको छ। महाधिवेशनमा हुने निर्वाचनबाट १७१ जना केन्द्रीय सदस्य निर्वाचित हुनेछन् भने ६१ जना मनोनीत हुनेछन्।

पार्टी प्रवक्ता देवराज चालिसेले पदाधिकारीको संख्या थपिनुलाई नेता व्यवस्थापन वा नेता उत्पादनको अर्थमा बुझ्न नहुने बताए। 'कांग्रेसको कार्यक्षेत्र विस्तार हुँदैछ,' उनले भने।

सोही बैठकले सभापति गगनकुमार थापाले पेस गरेको २९ बुँदे राजनीतिक प्रतिवेदन सर्वसम्मत पारित गरेको सहमहामन्त्री कर्णबहादुर बुढाले जानकारी दिए। बैठकबाट अन्य प्रतिवेदन पनि पारित भएका छन्।