कांग्रेस क्षेत्रीय अधिवेशनमा विवाद: सुनसरी, मोरङ र सिन्धुपाल्चोकमा प्रक्रिया अवरुद्ध

नेपाली कांग्रेसको १५औँ महाधिवेशनअन्तर्गत मङ्गलबार भएका क्षेत्रीय अधिवेशनमा सुनसरी–४, मोरङ–१ र सिन्धुपाल्चोक–२ मा विवाद भएको छ। सुनसरी–४ मा कोशी गाउँपालिकाको लौकही सिटी हलमा मतदान चलिरहेका बेला क्षेत्रीय सभापतिका उम्मेदवार गफार अन्सारी र मनोज साहका पक्षबीच झडप भएको थियो। झडपका कारण त्यहाँ केहीबेर निर्वाचन प्रक्रिया रोकिएको थियो।

वर्तमान क्षेत्रीय सभापति ऐयुब अन्सारीले फर्जी मतपत्र भेटिएको आरोप लगाउनुभएको छ। गफार पक्षले भने उहाँमाथि मतपेटिकामा लात हानेर निर्वाचन बिथोल्न खोजेको आरोप लगाएको छ। स्थिति सहज भएपछि मतदान अघि बढेको जिल्ला प्रहरी कार्यालय सुनसरीले जनाएको छ।

मोरङ–१ को लेटाङमा भएको अधिवेशनमा सर्वसम्मत नामावली पढिएपछि क्षेत्रीय सभापतिका आकांक्षी देवराज चाम्लिङले मञ्चबाट बोल्न खोज्नुभएको थियो। त्यसबेला जिल्ला सभापति डिगबहादुर लिम्बूसँग उहाँको धकेलाधकेल भएको थियो। उपस्थित कार्यकर्ताले हस्तक्षेप गरेर दुवै पक्षलाई छुट्याएका थिए।

अर्जुनकुमार तुम्रुकलाई क्षेत्रीय सभापति बनाउने सोमबार साँझको सहमतिपत्रमा चाम्लिङले पनि हस्ताक्षर गरेको बताइएको छ। चाम्लिङले भने आफूले दाबी नछाडेको कुरा सामाजिक सञ्जालमा लेख्नुभएको थियो। सिन्धुपाल्चोक–२ मा फर्जी मतपत्र भेटिएपछि निर्वाचन समितिले मतदान स्थगित गरेको छ।

त्यहाँ बागमती प्रदेश सांसद कृष्णकुमार तामाङ र पासाङ दोङबीच प्रतिस्पर्धा छ। दुवै पक्ष सहमत नभएसम्म मतदान सुरु नहुने समितिले जनाएको छ। एक नेताले मतपेटिकामा खुट्टाले हानेको भिडियो सामाजिक सञ्जालमा फैलिएको छ।