सर्वोच्च अदालतमा न्यायाधीशका लागि सिफारिस गरिएका चार जनाविरुद्ध उजुरी आह्वान

संघीय संसद्को संसदीय सुनुवाइ समितिले सर्वोच्च अदालतको न्यायाधीश पदमा सिफारिस गरिएका चार न्यायाधीशविरुद्ध उजुरी आह्वान गरेको छ। समितिले सोमबार सार्वजनिक सूचना जारी गर्दै उजुरी माग गरेको हो।

न्याय परिषद्ले अक्टोबर ६ मा बसेको बैठकबाट उच्च अदालतका चार न्यायाधीशलाई सर्वोच्च अदालतको न्यायाधीश पदमा नियुक्तिका लागि सिफारिस गरेको थियो।

सिफारिस भएकाहरूको संसदीय सुनुवाइ प्रक्रिया अघि बढाउन सार्वजनिक उजुरी माग गरिएको समितिले जनाएको छ। नियुक्ति हुनुअघि उनीहरूको संसदीय सुनुवाइ गर्नुपर्ने हुन्छ।

उजुरी आएमा त्यसमाथि छलफल गरेपछि समितिले सिफारिस गरिएका न्यायाधीशको सुनुवाइ प्रक्रिया अघि बढाउनेछ।