गौतम बुद्ध विमानस्थल पूर्ण क्षमतामा चलाउन माग, भारतसँग हवाई रुट सहमति बाँकी

भैरहवास्थित गौतम बुद्ध अन्तर्राष्ट्रिय विमानस्थल पूर्ण क्षमतामा चलाउन रुपन्देहीका सरोकारवालाले सरकारसँग माग गरेका छन्। बिहीबार भैरहवामा लुम्बिनीको पर्यटन र हवाई सम्पर्कबारे भएको गोष्ठीमा पूर्वराजदूत विजयकान्त कर्णले विमानस्थलको पूर्वाधार क्षमता र अहिलेको सञ्चालनबीच ठूलो खाडल रहेको बताउनुभएको छ। नियमित अन्तर्राष्ट्रिय उडान नहुँदा विमानस्थल आर्थिक दबाबमा परेको र निजी लगानी, रोजगारी तथा स्थानीय अर्थतन्त्र प्रभावित भएको उहाँको भनाइ छ।

सहभागीहरूले प्रभावकारी सञ्चालनका लागि सरकारको स्पष्ट नीति चाहिने बताएका छन्। शनिबार चेम्बर अफ कमर्स रुपन्देहीमा निजी क्षेत्र र पर्यटन व्यवसायीसँगको छलफलमा प्रतिनिधि सभा सदस्य पुनमकुमारी अग्रवालले सरकार आन्तरिक तयारीमा जुटेकाले छिट्टै नियमित उडान हुने बताउनुभएको छ। विमानस्थलबारे फैलिएका नकारात्मक भ्रम चिरेर अघि बढ्नुपर्ने उहाँको भनाइ छ।

अधिकारीहरूका अनुसार प्रधानमन्त्री बालेन्द्र शाहको आगामी भारत भ्रमणमा पोखरा र भैरहवाबाट भारतसम्म सिधा उडान र थप हवाई रुटको विषय सरकारको प्राथमिकतामा छ। सरकारले विभिन्न शुल्क छुटको सहुलियत घोषणा गरे पनि भारतीय वायुसेवाहरूले यी दुई विमानस्थलमा हालसम्म व्यावसायिक उडान थालेका छैनन्।