इजरायलमा नयाँ प्रधानमन्त्री घोषणा हुँदै, आइजेनकोट गठबन्धनलाई बहुमतको समर्थन

इजरायलमा राष्ट्रपति इसाक हर्जोगले नयाँ प्रधानमन्त्रीबारे घोषणा गर्ने तयारी गर्नुभएको छ। इजरायलमा सरकार बनाउन संसद्का ६१ सदस्यको समर्थन आवश्यक पर्छ। विपक्षी नेता गादी आइजेनकोटको गठबन्धनलाई ६ दलका ६७ सांसदको समर्थन रहेको बताइएको छ भने प्रधानमन्त्री बेन्जामिन नेतन्याहुसँग ४६ सांसदको मात्र समर्थन छ।

हालै भएको निर्वाचनमा भने दुवै नेताले एक्लै सरकार बनाउन पुग्ने बहुमत पाउन सकेका छैनन्। हर्जोगले बिहीबार संसद्मा प्रतिनिधित्व गर्ने सबै दलका नेतासँग छलफल गर्नुभएको थियो। उहाँले धेरै विषयमा राजनीतिक गुटहरूबीच असहमति र एकअर्काप्रति आपत्ति रहेकाले सांसदको सिफारिसका आधारमा मात्र सरकार गठनको निर्णय गर्न नसकिने बताउनुभएको छ।

इजरायलको इतिहासमा कुनै दलले एक्लै बहुमत नपाएकाले त्यहाँ सधैँ गठबन्धन सरकार बन्दै आएको छ। यसैबीच, विपक्षी खेमाका एक कट्टर नेताले अति–परम्परावादी यहूदीलाई सैन्य सेवा अनिवार्य गर्नुपर्ने आफ्नो पुरानो मागमा लचकता देखाएका छन्। यसलाई नेतन्याहुलाई हटाउन सक्ने गठबन्धन बनाउने प्रयासका रूपमा हेरिएको छ।

नेतन्याहुको अति–दक्षिणपन्थी सरकारप्रतिको असन्तुष्टिका कारण इजरायली–अरब समुदायले विपक्षलाई समर्थन गरेको छ। इजरायली समाज नेतन्याहुलाई लिएर गहिरो रूपमा विभाजित छ र तीन वर्षको युद्धले थकित बनेको छ।