राष्ट्रिय एआई सम्मेलन: डेटा सुरक्षा बोर्ड गठनको तयारी, दक्ष जनशक्तिमा जोड

डिजिटल मिडिया फाउन्डेसनले शनिबार ललितपुरको होटल हिमालयमा 'नेसनल एआई समिट २०२६' आयोजना गरेको छ। सम्मेलनमा सहभागी विज्ञहरूले एआईले रोजगारी खोस्ने डरभन्दा यसलाई सही ढंगले चलाउन सक्ने दक्ष जनशक्ति तयार पार्नमा ध्यान दिनुपर्ने बताएका छन्। उनीहरूले शिक्षा प्रणाली, पाठ्यक्रम र सीप विकासमा समयअनुसार परिवर्तन आवश्यक रहेको औँल्याएका छन्।

जापानको वासेदा विश्वविद्यालयका सहप्राध्यापक डा. विकास लम्सालले एआईमा पूर्ण भर पर्नुभन्दा त्यसको नतिजा सही हो कि होइन जाँच्ने क्षमता बढाउनुपर्ने बताउनुभएको छ। प्रधानमन्त्री कार्यालयअन्तर्गतको सूचना प्रविधि तथा डिजिटल गभर्नेन्स कार्यालयका सहसचिव सुवास ढकालले सरकारले छुट्टै डेटा सुरक्षा बोर्ड गठन गर्ने तयारी गरेको जानकारी दिनुभएको छ।

उहाँका अनुसार विधेयकको मस्यौदा तयार हुँदै छ र ६ महिनाभित्र मन्त्रिपरिषद्बाट पारित गरी संसद्मा लैजाने योजना छ। बोर्डले सरकारी निकायसँगै निजी क्षेत्र र नागरिकको डेटा सुरक्षा पनि हेर्ने उहाँको भनाइ छ। संयुक्त राष्ट्रसंघको डेटा गभर्नेन्स कार्यसमूहका सदस्य निक एस्टन–हार्टले नेपालले प्रविधिमा परनिर्भरता घटाउँदै स्वदेशी क्षमता र डिजिटल सार्वभौमिकतामा जोड दिनुपर्ने सुझाव दिनुभएको छ।