फ्रान्समा फेरि महँगीविरुद्ध प्रदर्शन, करिब एक हजार जना नियन्त्रणमा

फ्रान्समा बढ्दो महँगी, सार्वजनिक सेवामा कटौती, शिक्षा क्षेत्रमा बजेटको अभाव र आर्थिक असमानताविरुद्ध शनिबार देशभर प्रदर्शन भयो। प्रदर्शनका क्रममा प्रहरीले करिब एक हजार जनालाई नियन्त्रणमा लिएको छ। पेरिससहित विभिन्न सहरमा प्रदर्शनकारी र प्रहरीबीच झडप भयो र सडकमा अश्रुग्यास प्रहार गरियो।

सरकारका अनुसार शनिबारको प्रदर्शनमा देशभर चार लाख १० हजार मानिस सहभागी थिए। सुरक्षाका लागि ७० हजार प्रहरी परिचालन गरिएको थियो। केही र्‍यालीमा प्रतिबन्ध लगाइएको थियो। धेरै पसल र पेरिसका मेट्रो स्टेसनहरू पनि बन्द थिए।

गत साता भएका प्रदर्शनमा वर्षौँयताकै गम्भीर सहरी हिंसा भड्किएको थियो। त्यसपछि केही दिन कर्फ्यू लगाइएको थियो। कर्फ्यूपछि भएको यो प्रदर्शन पनि उग्र बन्यो।

यो आन्दोलन गत महिना पेरिसको बाहिरी क्षेत्रमा विद्यार्थीहरूले विद्यालयको अवस्थाविरुद्ध गरेको सानो प्रदर्शनबाट सुरु भएको थियो। त्यसपछि यो सरकारको आर्थिक नीतिविरुद्धको आन्दोलन बनेर देशभर फैलियो। यसले राष्ट्रपति इमानुएल म्याक्रोंमाथि दबाब बढाएको छ।