‘पोखरामा पर्यटकसँग दसैँ भेट’ नारासहित आज दसैँ पर्यटन तथा सांस्कृतिक महोत्सव

बडादसैँको अन्तिम दिन कोजाग्रत पूर्णिमाका अवसरमा आज आइतबार पोखरामा ‘दसैँ पर्यटन तथा सांस्कृतिक महोत्सव’ हुँदैछ। महोत्सव पोखराको लेकसाइडमा हुनेछ।

महोत्सवको नारा ‘टीका, जमरा र चङ्गा चेट, पोखरामा पर्यटकसँग दसैँ भेट’ राखिएको छ। दसैँलाई पर्यटनसँग जोड्न पोखराका महिला पर्यटन व्यवसायीले यो कार्यक्रम आयोजना गरेका हुन्।

कार्यक्रममा विदेशी पर्यटकलाई टीका र जमरा लगाइनेछ। पोखराको पर्यटन क्षेत्रमा यस्तो कार्यक्रम पहिलो पटक हुन लागेको हो।

आयोजकले पर्यटकसँग दसैँको अनुभव साट्ने उद्देश्य राखेका छन्। ताल र हिमालका लागि चिनिने पोखरामा अब पर्यटकले दसैँको संस्कृति पनि नजिकबाट हेर्न पाउनेछन्।