चन्द्र भण्डारी: विभाजित कांग्रेस समयक्रममा एक हुन्छ, सरकार पाँच वर्ष चलोस्

नेपाली कांग्रेसका उपसभापति डा. चन्द्र भण्डारीले हाल विभाजित कांग्रेस समयक्रममा फेरि एकजुट हुने बताउनुभएको छ। शनिबार बुटवलमा कांग्रेस रुपन्देही क्षेत्र नम्बर २ ले आयोजना गरेको कार्यक्रममा उहाँले भविष्यमा दुवै पार्टी मिल्ने भएकाले एकअर्कालाई गाली नगर्न नेता–कार्यकर्तालाई आग्रह गर्नुभयो।

सभापति गगन थापालाई विद्यार्थीकालदेखि चिनेको उल्लेख गर्दै उहाँले थापाले पार्टीलाई एकताबद्ध बनाउने दाबी गर्नुभयो। प्रधानमन्त्री बालेन्द्र शाह काठमाडौँ महानगरपालिकाको मेयर हुँदा उहाँले मागेका प्रमुख प्रशासकीय अधिकृत तत्कालीन सरकारले नपठाएकाले अहिलेको परिस्थिति बनेको भण्डारीको दाबी छ। त्यसबेला केपी शर्मा ओली, शेरबहादुर देउवा र मुख्यसचिवदेखि सचिवसम्मलाई आफूले यसबारे भनेको तर महत्त्वाकांक्षाका कारण कसैले नमानेको उहाँले बताउनुभयो।

त्यो माग पूरा भएको भए बालेन दोस्रोपटक पनि मेयरमै उम्मेदवार बन्ने उहाँको तर्क छ। यही कारण जेनजी विद्रोहको अवस्था आएको उहाँको भनाइ छ। बहुमत पाएको सरकारले अनावश्यक विवादमा समय खर्चनुभन्दा जनताका पक्षमा काम गर्नुपर्ने भण्डारीले बताउनुभएको छ।

सामाजिक सञ्जालमा दर्शक बढाएर मात्र सरकार नचल्ने र काम गरेरै जनमत जित्नुपर्ने उहाँको भनाइ छ। कसैले गल्ती गरेको भए कानुनी प्रक्रियाबाट कारबाही गर्नुपर्ने तर काम प्रभावित हुने गरी आरोप–प्रत्यारोपमा नलाग्न उहाँले आग्रह गर्नुभयो। कार्यक्रममा बोलेका अन्य कांग्रेस नेताहरूले सरकारका कदम विधिको शासन, लोकतन्त्र र प्रेस स्वतन्त्रताको विपक्षमा रहेको आरोप लगाएका छन्।

उनीहरूले लोकतन्त्रपक्षीय दलहरू एक ठाउँमा आउनुपर्ने बताएका छन्।