कांग्रेस खुला केन्द्रीय सदस्यमा चिरीबाबु महर्जन अगाडि, दलिततर्फ डा. डीबी सुनार अग्रस्थानमा

नेपाली कांग्रेसको १५औँ महाधिवेशनअन्तर्गत खुला केन्द्रीय सदस्यको मतगणनामा चिरीबाबु महर्जनले अग्रता कायमै राखेका छन्। ५ हजार ४०० मत गन्दा महर्जनले ४ हजार १४९ मत पाएका छन्।

दोस्रो स्थानमा निश्कल राई छन्। उनले ३ हजार ८४० मत पाएका छन्।

केन्द्रीय सदस्य (दलित खुला) तर्फ ६ हजार ५०० मत गन्दा डा. डीबी सुनारले सबैभन्दा धेरै ३ हजार १६० मत पाएका छन्। दलित क्लस्टरका ८ जना केन्द्रीय सदस्यको नतिजा पनि सार्वजनिक भएको छ। यसमा डा. डीबी सुनार, सागर परियार र हरिशरण नेपालीलगायतको नाम छ।

सहमहामन्त्री खस आर्यतर्फको मतगणनामा मनोजमणि आचार्य अगाडि छन्। केन्द्रीय कार्यसमिति चयनका लागि भइरहेको मतगणनाको पूरा नतिजा आज रातिसम्म सार्वजनिक हुने बताइएको छ।