टीकापछि पिङको रौनक: गोरखाको सिरानडाँडामा रोटे पिङ, गुल्मीमा लिङ्गे पिङ फर्कियो, गाउँको पिङ सहरमा

दसैँको टीकापछि गोरखाको अजिरकोट गाउँपालिकास्थित सिरानडाँडामा स्थानीयहरू परम्परागत रोटे पिङमा रमाएका छन्। सिरानडाँडाको पिङ खेल्न आसपासका गाउँबाट समेत मानिसहरू पुगेका थिए। दसैँ बिदामा गाउँ फर्किएकाहरूको उपस्थितिले त्यहाँ चहलपहल बढेको छ।

टीकाको दिन एकपटक भए पनि जमिन छोड्नुपर्छ भन्ने पुरानो मान्यतासँग पिङ जोडिएको छ। गाउँघरमा बाँसका लामा लिङ्गा गाडेर बनाइएका पिङमा टीकापछि मानिसहरूको घुइँचो लाग्ने गर्छ। गुल्मीको छत्रकोट गाउँपालिका–३ धरमपानीमा ओझेलमा परेको लिङ्गे पिङ फेरि हालिएको छ।

नवप्रगतिशील युवा क्लबको पहलमा यो पिङ बनाइएको हो। सहरीकरण, सडक विस्तार, बसाइँसराइ र बदलिँदो जीवनशैलीले गाउँमा पिङ हाल्ने चलन घट्दै गएको छ। नयाँ पुस्तालाई मौलिक संस्कृतिको महत्त्व बुझाउन पिङ बनाइएको क्लबले जनाएको छ।

क्लबका संस्थापक अध्यक्ष जनक पन्थका अनुसार स्थानीयमा खुसी र उमङ्ग थप्नु पिङको उद्देश्य हो। विगतमा गाउँका युवा घरघरबाट खर सङ्कलन गरी र काठ जुटाएर सार्वजनिक स्थलमा पिङ हाल्थे। रोजगारी र अध्ययनका लागि मानिसहरू सहर पसेसँगै पिङ संस्कृति पनि सहरतिर सरेको छ।

अहिले सहरका होटल र सार्वजनिक स्थलमा पनि चाडपर्व लक्षित पिङ राख्न थालिएको छ। तराईमा पनि जमरा लगाएर लिङ्गे पिङ खेल्न जानेको सङ्ख्या धेरै देखिएको छ।