फ्रान्स: ट्रम्पले ले पेनको प्रशंसा गरे, अशान्तिले पर्यटन क्षेत्रमा असरको चिन्ता

अमेरिकी राष्ट्रपति डोनाल्ड ट्रम्पले फ्रान्सकी दक्षिणपन्थी नेतृ मरिन ले पेनको प्रशंसा गर्दै उहाँलाई 'रूढीवादी आवाज' भन्नुभएको छ। तर सन् २०२७ को फ्रान्सेली राष्ट्रपतीय निर्वाचनमा ले पेनलाई साथ दिने वा नदिने विषयमा उहाँले स्पष्ट जवाफ दिनुभएको छैन। पत्रकारको प्रश्नमा ट्रम्पले आफूले ले पेनलाई भेट नगरेको बताउनुभएको छ।

अमेरिकामा मध्यावधि निर्वाचन नजिकिँदै गर्दा ट्रम्पले फ्रान्सको अशान्तिलाई आप्रवासन र वामपन्थी राजनीतिमाथि टिप्पणी गर्ने अवसरका रूपमा प्रयोग गर्दै आउनुभएको छ। उहाँले फ्रान्सको अशान्तिलाई सामान्य दंगा नभई क्रान्तिजस्तो र अझै जारी रहेको बताउनुभएको छ। यता निस, पेरिस र लियोनलगायतका सहरमा प्रहरीसँग झडप, आगजनी र लुटपाटका दृश्य विश्वभर फैलिएपछि पर्यटन व्यवसायी चिन्तित बनेका छन्।

हिंसा दोहोरिए पर्यटक आगमन र आम्दानी थप घट्न सक्ने उनीहरूको चेतावनी छ। पर्यटन संस्थाहरूको छाता सङ्गठन एडिएन टुरिजमकी प्रमुख क्रिस्टेल कासाग्नेले प्रमुख सहरमा देखिएको हिंसालाई विनाशकारी भन्नुभएको छ। उहाँका अनुसार पर्यटक होटलभित्र थुनिन होइन, घुमफिर र रमाइलो गर्न आउँछन्।

कतिपय पर्यटकले पेरिसको सुरक्षामाथि प्रश्न उठाएका छन् भने केहीले यात्रा रद्द वा स्थगित गर्ने विचार गरेका छन्।