परदेशमा दसैँ: टर्की, अस्ट्रेलिया, फिजी र बेलायतमा नेपालीले मनाए

टर्की, अस्ट्रेलिया र बेलायतलगायतका देशमा रहेका नेपालीले सामूहिक कार्यक्रम गरेर बडादसैँ मनाएका छन्। टर्कीको एल्बिस्तानमा टर्की एल्बिस्तान एकता समाजले गरेको दसैँ कार्यक्रममा करिब १४४ जना नेपाली सहभागी थिए। दाङका मानसिं नेपालीको संयोजकत्वमा भएको कार्यक्रममा टर्की र चीनका नागरिक पनि सामेल भएका थिए।

सहभागीले बुटवलका ज्येष्ठ नागरिक चिरञ्जीवी पोखरेलबाट टीका र जमरा थापेका थिए। एकै ठाउँ भेला हुँदा परिवारसँगै भएजस्तो लागेको सहभागीहरूले बताएका छन्। अस्ट्रेलियाको सिड्नीस्थित हर्स्टभिल पुस्तकालयमा जर्जेस रिभर काउन्सिलले अक्टोबर १७ मा 'नेपाली कल्चर कनेक्सन: दसैँ' कार्यक्रम गरेको छ।

त्यहाँ नेपाली परिकार, परम्परागत चिया, सांस्कृतिक प्रस्तुति र बालबालिकाका गतिविधि राखिएका थिए। बेलायतमा नेपाली कल्चरल सेन्टर युकेले उपसंयोजक भीमलाल भट्टराईको सभापतित्वमा भर्चुअल शुभकामना आदानप्रदान कार्यक्रम गरेको छ। कथा व्यास पण्डित कुबेर सुवेदीले भित्रको घमण्ड र रिसलाई पराजित गरेपछि मात्र मानिस असल बन्ने बताउनुभएको छ।

उहाँले सन्तानलाई आफ्नो संस्कार र संस्कृतिसँग जोडिराख्नुपर्नेमा जोड दिनुभएको छ। सुवेदीले आगामी एक वर्षभित्र सांस्कृतिक केन्द्र स्थापना गर्ने योजनालाई शुभकामना पनि दिनुभएको छ। गुरु चिरञ्जीवी ढकालले पश्चिम लन्डनमा सांस्कृतिक केन्द्र र मन्दिर बनाउने पहललाई सौभाग्यको विषय भन्नुभएको छ।

फिजीमा बसोबास गर्ने नेपाली मूलका नागरिकले पनि दसैँ मनाएका छन्।