टीकाको दोस्रो दिन पनि मान्यजनबाट टीका–जमरा थाप्ने क्रम जारी, कोजाग्रत पूर्णिमासम्म चल्ने

बडादसैँअन्तर्गत टीकाको दोस्रो दिन आज बिहीबार पनि मान्यजन तथा आफन्तबाट नवदुर्गाको प्रसादका रूपमा टीका र जमरा लगाउने क्रम जारी छ। आज आश्विन शुक्ल एकादशी अर्थात् पापाङ्कुशा एकादशी हो।

विजयादशमीको दिन घरपरिवारभित्र टीका–जमरा लगाइएपछि आज पनि मान्यजन र आफन्तबाट टीका थाप्ने क्रम चलिरहेको छ। पापाङ्कुशा एकादशीदेखि कोजाग्रत पूर्णिमासम्म मान्यजनबाट टीका, जमरा र आशीर्वाद थाप्ने परम्परा नेपाली समाजका कतिपय ठाउँमा रहिआएको छ।

बडादसैँ अर्थात् दुर्गापक्षको मुख्य दिन विजयादशमीमा हिजो बुधबार मान्यजनबाट नवदुर्गाको प्रसादका रूपमा टीका, जमरा र आशीर्वाद ग्रहण गरिएको थियो। रातो टीकालाई शुभ साइतको प्रतीक मानिन्छ।

परम्पराअनुसार कोजाग्रत पूर्णिमासम्म मान्यजनबाट टीका र आशीर्वाद लिन सकिन्छ। त्यसैले टाढाका आफन्त र मान्यजनकहाँ टीका थाप्न जाने क्रम आगामी दिनसम्म पनि जारी रहनेछ।