बाढीले खोस्यो दसैँको टीका, बर्दियामा बेपत्ता आफन्तको पर्खाइमा परिवार

बर्दियाका कतिपय परिवारले यस वर्ष बडादसैँको टीका लगाउन पाएनन्। दसैँमा टीका लगाउन घर फर्किने आफन्तको खबर कुरिरहेका परिवारमा बाढीले एकाएक दुःख ल्याएको हो।

बडादसैँमा अभिभावकको हातबाट टीका र जमरा लगाएर आशीर्वाद थाप्ने चाहना धेरैको हुन्छ। वर्षभरि जहाँ भए पनि दसैँमा घर फर्किएर परिवारसँग टीका लगाउने र खुसी साटासाट गर्ने परम्परा छ। यस्तै प्रतीक्षामा रहेका परिवारले यसपटक बाढीको खबर पाए।

टीका लगाउने तयारीमा रहेका यी परिवारको दसैँको खुसी बाढीको खबरसँगै खोसियो। बेपत्ता आफन्तको पर्खाइमा रहेका उनीहरूको निधार टीकाको दिन पनि खाली रह्यो।

एकातिर देशभर टीका र जमरासहित दसैँ मनाइँदै गर्दा बाढीबाट प्रभावित परिवार भने आफन्त गुमाउनुको पीडा र बेपत्ता आफन्तको खोजीको प्रतीक्षामा छन्। उनीहरूका लागि यसपटक दसैँ उत्सवको होइन, पर्खाइ र पीडाको पर्व बनेको छ।