पृथ्वी राजमार्गको मलेखु–मुग्लिङ सडकखण्ड आज केही घण्टा बन्द हुने

पृथ्वी राजमार्गअन्तर्गत मलेखु–मुग्लिङ सडकखण्डमा आज केही घण्टा सवारी आवागमन बन्द हुने भएको छ। धादिङको बेनीघाट रोराङ गाउँपालिका–९ मझिमटारमा निर्माणाधीन आकाशे पुलमा यात्रु हिँड्ने भाग (गर्डर) राख्नुपर्ने भएकाले सडक बन्द गर्न लागिएको हो।

जिल्ला प्रशासन कार्यालय धादिङले यसबारे सूचना जारी गरेको छ। नागढुङ्गा–मुग्लिङ सडक आयोजना पश्चिम खण्डका सूचना अधिकारी सचेन्द्र मिश्रका अनुसार पुलको गर्डर राख्ने कामका लागि सडक बन्द गर्न लागिएको हो।

सडक कति समय बन्द हुन्छ भन्नेमा सञ्चारमाध्यमका विवरण फरक छन्। कतिपयले तीन घण्टा र कतिपयले चार घण्टा सडक बन्द हुने जनाएका छन्। इमेजखबरका अनुसार बिहान ११ बजेदेखि सडक बन्द गरिनेछ।

पृथ्वी राजमार्गको यस खण्ड हुँदै यात्रा गर्ने यात्रु र सवारी चालकलाई तोकिएको समय ख्याल गरेर यात्रा मिलाउन प्रशासनले सूचनामार्फत जानकारी दिएको छ।